თუ საუკეთესო ტრანსპორტზე გადაჯდომის დიდი და მნიშვნელოვანი გადაწყვეტილება უკვე მიიღე, მაშინ დროა, ამ საუკეთესო ტრანსპორტს ყველაზე სწორ ადგილას მიაგნო. ჰოდა, ეს სწორი ადგილი ბევრისთვის კარგად ნაცნობი სკუტ სკუტის შოურუმია, რომელიც ჩვენი მომხმარებლების მოგონებებში ძალიან ძვირფას ადგილს იკავებს. რატომ? რატომ და იმიტომ, რომ როცა ორბორბლიან ტრანსპორტზე გადმოჯდომის გადაწყვეტილებას იღებ, უბრალოდ პროდუქტს კი არა, ცხოვრების სრულიად ახალ წესს ყიდულობ და ფეხს სრულიად ახალ სამყაროში დგამ. ჰოდა, ეგ ფეხი არ უნდა აგიცდეს, თუ გინდა, რომ ახალი ცხოვრება საუკეთესო გამოცდილებით დაიწყო. დავიწყოთ იმით, რომ შოურუმში შემობიჯების პირველივე წამს რაღაც ძალიან დიდის ნაწილი ხდები, რასაც, შესაძლოა, იმ მომენტში ვერ გრძნობდე, მაგრამ დროდადრო აუცილებლად იგრძნობ - იგრძნობ, რომ ერთი დიდი ოჯახის წევრი ხარ, სადაც შენი პირადი ტრანსპორტი ყველას ზუსტად ისე უყვარს, როგორც შენ და სადაც ყველა მზად არის, ნებისმიერი პრობლემის გადაჭრაში დაუზარებლად დაგეხმაროს. სკუტ სკუტის მიღმა დგანან ადამიანები, რომლებსაც გაგიჟებით უყვართ თავიანთი მომხმარებლებიც და პროდუქტებიც და რომლებიც სულ ცდილობენ, სწორი პროდუქტი სწორ ადამიანთან დააბინავონ, თან ისე, ყველა რომ კმაყოფილი დარჩეს და თან ისე, ერთხელ და ორჯერ კი არა, ამ ტრანსპორტის სიცოცხლის უკანასკნელ წამამდე ყველა ხარვეზის მოგვარებაში რომ დაგეხმარონ. ერთი სიტყვით, სკუტ სკუტში ნაყიდი ტრანსპორტი შოურუმს ბოლომდე არასდროს ტოვებს, რადგან სკუტსკუტელი ჯადოქრები თავიანთი ჯადოსნური ჯოხებით ყველგან გამოგყვებიან, ყველგან მოგიკითხავენ და შენს ახალ შენაძენს შენთან ერთად გამოზრდიან. მერე რა ხდება? მერე ხდება ის, რომ ეს ოჯახი უფრო და უფრო ფართოვდება. იმის მისახვედრად დიდი დრო არ დაგჭირდება, რომ სკუტ სკუტი ათასობით სკუტერისა და მოტოს მძღოლს აერთიანებს, რომლებსაც, გაგიკვირდებათ და, ერთმანეთის ყველაზე მეტად ესმით, რადგან ერთნაირი თუ არა, მსგავსი ცხოვრების სტილით ცხოვრობენ. ჰოდა, წელიწადში რამდენჯერმე ამ ერთნაირ ადამიანებს საყოველთაო შეკრებებზე ერთად ვუყრით თავს, სადაც ერთმანეთს ჩვენს ისტორიებსა და გამოცდილებას ვუზიარებთ, ქუჩებს ერთად ვლაშქრავთ და მთელ ქალაქს ვაგებინებთ, რომ სულ მალე მთელი ქვეყანა ჩვენ ვიქნებით. გარდა იმისა, რომ ორთვლიან ტრანსპორტზე შემოჯდომის პირველივე წამიდან ერთ დიდ თერაპიულ თავგადასავალში ეშვები, სადაც თითოეული მგზავრობა ჰაერისა და სიამოვნების ტალღების სინთეზია და სადაც სამყაროს ბევრად უფრო გრძნობ, ვიდრე ნებისმიერ სხვა ადგილას, არის კიდევ ერთი რაღაც: ურთიერთობა. ურთიერთობა არის ის ერთადერთი მუდმივი რამ, რომელიც ამ ტრანსპორტზე ჯდომისას სულ თან დაგყვება - ყველა მოსახვევში, ყველა შუქნიშანზე და ყველა ქუჩაზე. საჭესთან ხომ მარტო ზიხარ, მაგრამ ბოლომდე მარტო მაინც არასდროს ხარ, რადგან რომელიმე შუქნიშანზე აუცილებლად გაგიღიმებს სხვა სკუტერის მძღოლი, აუცილებლად დაგისიგნალებს ვიღაც, ვისაც ზუსტად შენნაირი სკუტერი ჰყავს, აუცილებლად გამოგელაპარაკება რომელიმე კურიერი და აუცილებლად გისურვებს მშვიდობიან გზას, გკითხავს რამდენი ხანია, რაც მძღოლი ხარ და თუ რამე შეგეშლება, აუცილებლად აუღელვებლად აგიხსნის და საჭირო თუ გახდა, არც გრძელი დიალოგისთვის გაჩერებას დაიზარებს. მოკლედ, ეს უხილავი ოჯახი ყოველთვის ყველგან არსებობს და სკუტ სკუტის უპირველესი ამოცანა სწორედ ისაა, რომ ეს ადამიანები ერთმანეთთან კიდევ უფრო მეტად დაახლოვოს და საუკეთესო გამოცდილება შეუქმნას. ორთვლიანი ტრანსპორტის მძღოლობას კიდევ ერთი გვერდითი ეფექტი ახლავს თან - ამ სიამოვნებას საკუთარ თავზე როცა გამოცდი, მერე მოსვენებას კარგავ და დაუოკებელი სურვილი გიპყრობს, რომ სხვებსაც გააგებინო, სხვებსაც ურჩიო, სხვებსაც ასწავლო და სხვებსაც შეაგრძნობინო. ეს სურვილი არც სკუტსკუტელებს გვასვენებს, რის გამოც ჩვენ და ჩვენი სტაჟიანი მეგობრები თვეში რამდენჯერმე უფასო სწავლების დღეებს - ე.წ „სკუტერის დღეებს“ ვაწყობთ. „სკუტერის დღეებზე“ დამწყებ და გამოუცდელ ადამიანებს სკუტერთან პირველი შეხების შიშის გადალახვაში ვეხმარებით, საბაზისო ცოდნას ვუზიარებთ და ვცდილობთ, პირველი ნაბიჯები ლამაზ და დაუვიწყარ მოგონებად ვუქციოთ. „სკუტერის დღეებზე“ ბევრ შეშინებულ სახეს ნახავთ, რომლებიც დღის ბოლოს სიამაყითა და ბედნიერებით იცვლება, რადგან ადამიანები, რომლებიც ჩვენთან სასწავლად მოდიან, ტერიტორიას გაცილებით მამაცები ტოვებენ და ჩვენც მათ თვალებსა და აღელვებულ ხმის ტემბრში ყოველთვის ვხედავთ დიდ ცვლილებებს - ვხედავთ, რომ სულ მალე აუცილებლად გაბედავენ მეტს, აუცილებლად აიხდენენ ოცნებებს და აუცილებლად იქროლებენ ქალაქის ქუჩებში ლაღად და თავისუფლად. ჰოდა, სკუტსკუტელებს (ანუ სკუტ სკუტსა და ჩვენს მეგობარ მომხმარებლებს) რამდენიმე რაღაც გვაერთიანებს: თავისუფლება, მეგობრობა და აღმოჩენები. სულ რომ მარტო იყო, კითხვები რომ გქონდეს, რაიდისთვის პარტნიორს რომ ვერ პოულობდე ან უბრალოდ საუბარი რომ გინდოდეს, ჩვენთან მეგობარს აუცილებლად იპოვი. იპოვი და თან რამდენს! ერთსა და ორს კი არა, ათეულებსა და ასეულებს, რადგან დღითი დღე ვიზრდებით, ვიზრდებით და სულ მალე მთელი ქვეყანა ჩვენ ვიქნებით!