დავიწყოთ თავიდან.
რა არის მოპედი?
მოპედი არის პატარა, დაბალძრავიანი (50 კუბზე ნაკლები) მოტოციკლი ველოსიპედის პედლებით. შესაბამისად, მისი სიჩქარე ველოსიპედზე ოდნავ მაღალია, თუმცა სკუტერსა და მოტოციკლზე - გაცილებით დაბალი. თვითონ სიტყვა მოპედი (moped) ორი სიტყვის, მოტორის (motor) და პედალის (pedal), შეერთებით მიიღეს.
მიუხედავად იმისა, რომ დღეს-დღეობით მოპედები პირვანდელი სახით, ანუ პედლებით, იშვიათად გვხვდება, ტერმინი მაინც შემორჩენილია და ხშირად 50 კუბზე ნაკლები კუბატურის მქონე მოტოციკლებს უწოდებენ მოპედებს.
მოკლედ რომ გითხრათ, მოპედი არის ველოსიპედი ძრავით, რაც, დამეთანხმებით, რომ სრულიად განსხვავდება სკუტერისგან როგორც ვიზუალით, ისე ტექნიკურადაც. ჰონდას ორბორბლიან პროდუქტებშიც შეხვდებით მოპედებს, რომელთაგან საქართველოში ყველაზე ცნობადი მოპედი Honda Super Cub-ია.
ახლა გადავიდეთ სკუტერზე.
რა არის სკუტერი?
სკუტერი არის სკუტერი. სკუტერი არის
ჰონდა ჯიორნო,
ჰონდა თუდეი,
იამაჰა ვინო, კლიკი,
დიო, ვესპა და ა.შ. სკუტერი (scooter) ინგლისური სიტყვა “scoot”-იდან მოდის, რაც სადმე ჩქარა წასვლას ნიშნავს.
მოტოციკლისგან და მოპედისგან განსხვავებით, სკუტერს უფრო დიდი ადგილი აქვს წინ ფეხების დასადებად, რაც ვიზუალურად სრულიად განასხვავებს მას დანარჩენი ორბორბლიანი ტრანსპორტისგან. გვხვდება უფრო მაღალძრავიანი (250 კუბამდე) სკუტერებიც.
მის აღსაწერად ყველაზე მეტად მსოფლიო სკუტერების პიონერი,
ვესპა, გამოგვადგება: სწორედ ვესპამ მოიტანა ჩვენამდე სკუტერის ის ვიზუალი, რომელსაც დღეს ვხედავთ. აღსანიშნავია ისიც, რომ არ არსებობს ვესპას მოპედი. ვესპა ყოველთვის სკუტერების მწარმოებელი იყო და ასეც გრძელდება დღემდე.
